Desde cu mi ta traha, ora mi bira malo, Svb ta contribui na mi dolor. Como tres aña pasa mi a sufri di pneumonia; mi tabata haya dificultad pa hala rosea, ta hopi zwak cu kentura, diaree y sacamento. Y toch asina mi mester a sinta durante mas di dos ora den sala di Svb warda pa control di dokter. No tin otro manera.
Awe mi tin Covid-19. E sintomanan ta casi igual cu pneumonia. Loke ta yuda mi sinti miho ta drumi, bebe likido cayente, y ibuprofen. Pero durante ultimo 5 dia, mi mester lanta TUR mainta pa purba di resolve pa Svb paga mi mi dianan ao.
Tur cos a cuminsa e prome dia di control. Tabata e di tres dia di mi ao, dus mester haya yamada di dokter di Svb pa control. Door di kentura mi ta bay bin for di tino, dus mi tabata 'drumi' ora dokter di Svb a yama y mi no a contesta, pa loke mi ao no ta valido. Mi a haya hopi stress pero claro, mi ta respeta nan maneho y mi a compronde cu tabata mi fout. Esey tabata riba diabierna. Den weekend, mi a purba di tuma contacto cu Svb henter weekend. Mi a gasta 20 florin na carchi. Mi a keda mas di mey ora ta warda na linea sin haya contesta.
Yega dialuna, mi a yama atrobe - atrobe mester warda yamada pa control medico. Sinembargo, ora e yamada a yega mi tabata den baño ta saca. Mi a core yama back mesora. Nan a yama 10:32; mi a yama back 10:34, pero nan a bisa cu 'dokter ya a pone cu bo no a contesta', pues atrobe nan no ta aproba mi ao. Comosifuera ta imposibel cu un yamada por bay perdi pa cualkier motibo - sea bo tabata na telefon cu bo doño di trabao, cu bo dokter di cas pa haya remedi, of bo tabata saca den baño. Maske mi a yama back mesora, dus mi no ta nenga pa wordo controla pa dokter, Svb a dicidi di no paga mi dia - atrobe.
Okay, mi a pensa, ya cu mi no ta ao riba diabierna, diasabra, diadomingo y dialuna - y mi tabata ao apenas dos dia antes - mi a meld ao atrobe riba diamars. Algo den mi a bisa mi pa yama Svb y sigura cu nan a registra mi ao.
E persona cu ken mi a papia, di mal manera a informa mi cu mi ao 'a sigui core' desde diabierna. Ablief? Bo no a bisa mi cu mi ao no ta 'aproba'?
Mi a pidi pa clarifica si segun Svb mi ta ao of no. Nan kiermen mi ta ao desde e prome dia cu mi a meld, ta djis nan no ta bay paga, pero toch, mi ta ao. Mi no mag papia cu dokter mas pasobra 'dokter tin hopi hende pa yama', comosifuera esey ta problema di e ciudadano y responsabilidad di e ciudadano. Mi ta compronde cu mester ta disponibel, pero e hecho cu si cualkier cos bay malo cu un yamada ta nifica no por haci nada mas, ni si yama back mesora, simplemente, no tin nada mas pa haci, ta parce mi algo ilogico. E trato di personal di Svb tambe ta laga demasiado di desea: niun tiki consideracion pa hende cu ta malo.
Dus awe atrobe mester keda lanta henter mainta, sin usa telefon, y spera den Dios su poder mi sacamento of cualkier otro cos no coincidi cu e bendito yamada di Svb. Si no, mi lo mester busca manera pa biba cu 3/4 di 80% di mi salario fin di luna. Sin importa cu mi pago di Svb si ta yega completo tur luna.
Svb, please, haci un maneho humano cu ta duna hende, cu ta MALO, oportunidad di papia cu dokter. Bin cu un maneho flexibel cu no ta djis yama dentro di un orario diminuto (7:30am-9am). Y por fabor, tene un tiki logica den boso maneho. Mientras tanto, DVG si a keda controla nechi cu mi ta den cuarentena, tur dia ta check up cu mi con ta bayendo cu mi sintomanan, y semper a trata mi cu respet y comprension. Unda Svb su servicio a keda?
PS: Cualkier persona cu tin storianan asina pa conta, please message mi. Nos ta bay yuda Svb mehora.
No comments:
Post a Comment